Наврўз арафасида “Ўзбекистон темир йўллари” қўшимча рейслар қатновини йўлга қўяди.

Наврўз байрамида фуқароларимиз ҳамда туристлар учун қулайликлар яратиш, шунингдек дам олиш кунларидан оқилона фойдаланишни ташкил этиш мақсадида “Ўзбекистон темир йўллари” ички рейсларга қўшимча поездлар қатновини йўлга қўяди. Бу ҳақда УзА хабар бермоқда.

Йўловчилар оқимига қараб 16, 34, 54 нафар одамга мўлжалланган вагонлар байрам кунларида Тошкентдан юртимизнинг қадимий Самарқанд, Бухоро ва Хива шаҳарларига чартер йўналиш сифатида қўйилади.  

Тошкентдан йўлга чиққан поезд Самарқандда икки, Бухорода икки ва Хивада бир кун туриб, йўловчиларни олиб қайтади. Йўналишлар буюртмага кўра ўзгариб, чипта нархи ҳам шунга мос равишда ҳисобланади. Поезд жойларда кутиб тургани учун чипта нархи оддий поездникидан қимматроқ бўлиши мумкин.

Шунингдек, байрам кунларида поездлар чипталарига имтиёзли нархлар ҳам белгиланган. Жумладан, талабалар, ўқувчилар ҳамда нафақахўрлар учун чиптанинг тариф қисмидан 10 фоиздан 50 фоизгача чегирма жорий этилди. Ҳозирда талаб юқори бўлган йўналишларни ўрганиб, байрам кунларида поездлар ҳаракат жадвалига ўзгартириш киритиб, қўшимча йўналишларга қатновчи поездлар йўлга қўйиш бўйича ўрганиш олиб борилмоқда.